ديسمبر17 .. عام على الثورة ..

ديسمبر17 .. عام على الثورة .. ولا خلينا واقعيين ونقولو محاولة الثورة ..
قبل باشهر كتبت حاجة على تسعة أشهر بعد الثورة .. بصراحة مفماش حاجة كبيرة تصلح للذكر تزادت ..

الثورة بدات بخبزة مرفوعة وشعارات تنادي بالعدالة الإجتماعية والخبز والعمل .. بدات بطبقة فقيرة وتحت خط الفقر .. بناس مش لاقية تاكل.. ناس تحب تخدم ..وتعيش مستورة .. هذا لحد جانفي 14.. هربشي بن علي .. حسناشي روحنا عملنا حاجة كبيرة .. دخلتشي طرف احزاب عل خط عملناشي قصبة ثنين طيحناشي حكومة ثانية .. رجعوشي لاحزاب مرة أخرى ولاوشي هوما إلي جابو اصيد من ... وذنو..
دخلتشي بعضها .. جاشي الغنوشي .. تخلطشي لحابل بنابل .. ولاتشي احزاب سياسية تتضارب على اقتسام الحكومة الجديدة ..
تنسى الشعب .. 300 شهيد ... 300 عيلة .. 300 أم تنكبت .. قلبها تحرق ..
المناطق المهمشة .. بطبيعة قعدت مهمشة !!

واللي يسكنوا فالمغاغر والأكواخ .. قعدوا يسكنوا فالأكواخ تحت لمطار ..
وتونس العاصمة .. قعدت عاصمة .. المشاكل لكل تتلم فيها .. المناطق الداخلية هاويني داخلية على روحها بعيدة عن كل مواضيع تطرح أو نقاشات تصير ول عاصمة لكل ملمومين فيها إلي يعمل في حملة إنتخاباتو .. واللي يناقش فالحريات .. والدين .. والنقاب .. والشيوعي والإسلامي ودرا شنية ..
نفس الشي ماتبدل شي .. حكومة ،
عام كامل .. 12 شهر .. برشة هبطات شوية طلعات.. واليوم جايين نحتفلو ..

نحتفلو باش بربي ؟؟
أنا مانيش مناس إلي احتفلت .. للأسف تنجم تكون مني المشكلة ووصلتني عدوى عدم الرضاء الأبدي .. ومعاش عجبني شي !!

من رايي كان السيد رئيس الجمهورية عمل جلسة تقيمية مع ممثلين من عامة اشعب من مختلف الولايات خاصةً الداخلية ! كان ربي رانا !

كان عملوا شوية استثمارات في بلاصة ال-200 نائب و-50 وزير ومصاريفهم كان ربي رانا .. قالوا منحة تحسين هندام !!!! فما عباد مش لاقية تلبس يا هذا ..
ما معنى أن نتصور مع أم شهيد ؟؟ هل هذا هو الحل ؟؟ هل بيع قصر من بلدنا لمن يشتري أكثر هو لحل لازمة إقتصادية ...
بصراحة .. أنا لم ولن اشارك في مثل هذه المسرحيات .. لن ادعي فرحاً بثورةً أكبر اهتماماتها النقاب ..
لذلك اليوم .. عشت يوماً عادياً .. يوم عمل بنسبة لي لا أكثر .. ربما أنا مثل عديد التونسيين اتمنى يوما الاحتفال به .. ولكن الأكيد ليس اليوم .. ليس اليوم

Comments

[Samia Lamine]

Je partage tout à fait ton point de vue. Ma nertah ou nestrah kaan ki nchouf mouhasabatil katala wattajmmou3iyyiin il foussad miin kawatid hom li ouzarahom. mich intikaam mais hak ichchaab ou
tarikhou ou hak hyat ouladou. Rahom dammrou liblad wil 3ibaad maddiyann wa m3anawiyann. wil msiba famma  chkoun ikoul naamlou kotla m3a tajammo3iyinn dhid nahdha. non! non! la mousalha kabla
l mouhasaba. 


 


Bonne soirée.