عين تندب وعين في إسماعيل

عندي مدة فرغتش قلبي  وإذا كنت مكتبتش فعلى خاطر معاش فهم روحي برشة في هل شكشوكة !

ساعة قبل مانبداو أيا مبروك للمنتخب التونسي على الترشح بارك الله فيه وبها لمناسبة عرفي هدالنا قازوزة قازوزة بلاش .. ماصاب يكمل هكا   ..

يقول القايل كيف نبداو نحلو في حاجة لزمنا نبدو بسرد وتفكيك الأحداث !

إلي صار توا في هل شهر إلي مازال مكملش !

عام جديد ! لعباد لكل مستبشرة ! شقلك شقال عليك بداية جديدة !

فعلاً بداية جديدة ! بداية تفكك كامل !

فجأةً وبطريقة أكبر إببرشة مل فترة متع الإنتخابات نرى في تونس تقسمت ال-2 بطريقة أساسية شق كافر و شق مسلم ولا يستسلم !   وبطريقة ثانوية لايتام قطر وايتام فرنسا ! خليني نقول إلي هل استعمالات اللغوية مانسمعوها كان في تونس .  
على أما أساس الله وأطراف أخرى أعلم !

أحداث منوبة الشهيرة في بلد كما تونس بلد كنت في بالي إلي هو بلد ديمقراطي معتدل ! يا نقرا بالنقاب يا كلية في حجم كلية الأداب تتسكر يا طلبة يشدو ادار ! عار علينا مع احترامي للأقلية المتنقبة أما كنا إنجمو نلقاو حل معاهم بطريقة أخرى ..

إقامة الحد على إتوانسة إلي منا فينا مهما كانت توجهاتهم الفكرية !

العنف الجسدي المسلط على الصحفيين ؟؟ مهما كان اتوجه السابق للصحافي مكنتش تنجم  تقاطعلو الجريدة متشرهاش تعمل صحافة مضادة ! بش توريه إلي إنت رافضو علاش العنف والضرب .. هل هذي هي أخلاق الإسلام وتسامح وقبول الأخر إلي كانوا يغنيو فيها الجماعات قبل الإنتخابات..

ثمة إنو يخرجلنا اسيد   الحاج متع التأسيسي ربي يفضلوا يعطينا أية يكفرنا بها  ويأمر بقطع أطرافنا !

زعمة خاطر مخربين ونعطلو فالحكومة تع الواحد وخمسين كرسي ربي يدوم عزها !

أي مالا إلي معتصمين فالمناطق الداخلية عندهم ألف حق يا سيد ! مهمش يخلصوا ثلاثة ملايين كيف سيادتك وماعندهمش كرهبة عندهم كان وجه ربي

وهما لحساب متاعهم مايبداش من تاريخ تشكيل لحكومة كيف ما إنت متخيل هما يحسبوا من نهار سبعتاش دسمبر 2011 ومن نهار الانتخابات المجيدة وأموركم إذا كان  انتوما ماخذين راحتكم فالنظام الداخلي ! غلطتكم مش غلطتهم !

هاذم ناس منا فينا نص مش لاقية تاكل يا سيدي ! وانا نرى إلي لغلطة مش غلطك غلطة نوابهم إلي مدافعوش أعليهم

وفالأخير العركة بين النهضة والسبسي اللي لثنين بنسبة لي لا واحد يتخير عالاخر ..لكلهم يجريو ورى اقتسام الكعكة وتونس ماشية فال ساقين ولا عادلة ولا حرية ولا كرامة لا والو 
 

خلاصة القول بنسبة لي :

الباجي قايد السبسي ضد النهضة والتريكا فخار يكسر بعضو ..
المجلس التأسيسي لعزوزة هززها الواد وهي تقول لعام صابة ..#TnAC
الشعب التونسي بين السياسة والكورة : عين تندب وعين في إسماعيل.

ندعي لربي الوضع يزيد يتأزم أكثر من هكا بش يفيض الكاس وتصير ثورة بالحق ثورة شعب مش احزاب وحركات!