نحكي عل مرا في نهار المرا

هل علينا أن نسقط من علوٍ شاهقٍ ونرى دمنا على أيدينا .. لندرك أنا لسنا ملائكة كما كنا نظن .. هكذا حدث درويش قال
أنا نقول هل كان علينا فعلاً أن نحطم واقعنا  على صخرة النقاب والعورة لنعرف قيمة المرأة 
أقول هذا لأني أحسست أن لجميع هذه اسنة محتفل بيوم المرأة أكثر مل العادة .. 
أن تكتب إمرأة منبتة عن المرأة
من هي المرأة ؟
هي أمي المنبتة مثلي الثائرة دوماً التي حطمت قالب التقاليد والمايجيش وه ودكتاتورية سي السيد وسي المجتمع ..
المرأة هي تونس .. وتونس بنينة .. .. أبداً مهاش عورة ومهاش زهمولة كحلة ..
مع تقبلي بإمتعاض للزهامل الكحل ..

المرا هي  فكرة .. نتفكر في كافي بار ريت 4 نسا
تضربت فيهم  4 أصحاب كيف ريتهم تبسمت محلاهم ...
وحدة مدينة لا تشرب لا تتكيف وحدة بلندا تتكيف ومتشربش ..
وحدة روس تشرب ومتتكيفش
وحدة سمرة تشرب وتتكيف وتغني ..
قالولي صورنا ..
من كثرة معجبوني والتصويرة قوية تمنيت نخليها عند ولي يحل فمو على تونس ونسا تونس نورهلو نقلوا أهيا تونس  
المرا هي السفساري لبيض والملية الملونة 
وهي الروبة وقلم الشفة لحمر
وهي السروال ...
هي لمرة إلي ريتها مرة في جانفي 2011 ومنجمتش ننساها تطلب في شارع باريز يميمتي مبنها هاك المرا 
عزوزة فوندو  وكلامها ذهب أما دارت عليها الدنيا ..
خليت تشيشة من قلبي عندها 
منحبش ادور عليا الدنيا ..
منحبش يدور عليا موكلي الدنيا فالأرض ..
المرا  هي هذيكة إلي نراها في كل مظاهرة ولينا نعرفو بعضنا من غير منعرفو بعضنا تتبسم تسلم عليا صوتها فينو وخافت 
وكيف تسخن وتتحرك وتبدا النار شاعلة 
تبدا تصيح تبدا تنادي عل حرية والكرامة صوتها يعلى نغزرلها وتتبسم 
نقول هاي انسا..
المرا هي أم إشهيد.. إلي تشوت في كبدتها ومازلت واقفة .. تفركس في حقها وتعتصم عافسة عل قلب والكبدة لممروجة 
وهي تلاجي وفالحكومة تراجي ..
وينو حق ولدي ؟


المرا هي أنا التونسية الضايعة فالثنية تلوج على طريق و في بلدها شكون يحطلها فالشوك يقولها إنت عورة  
 مصيبة جالبة للعار قابلة للإنفجار ..
حلك يا إما راجل ودار وكان اخترت الشارع عندك النقاب والطهار..
..المرا هي تونس وكان مندفعوش اليها وناقفولها على حضرها ميكونلهاش  مستقبل ..
وكل عادة لن يمروا ! 



رحمة خبثاني  

صدر في ضد السلطة عدد 8 مارس 2012