نستقيل ..

من عالم الحب والمشاعر والأحاسيس ، نقدم استقالتي ، 
معادش عيني .. معادش فيا نفس نكمل ، معادش انجم نزيد .. 
بنسبة ليا اتعب البدني ميعنلي شي .. إلي نحكي عليه هو وقت إلي نكمل الخدمة مخر فالليل ونروح .. الدنيا باردة .. والبيت باردة ... وقلبي بارد ... روحي من داخل فارغة ..
نروح لدار نقعد مع روحي .. نتذكر .. 
نحل لكمبيوتر نطل على بروفيلو  ...نتذكر .. نخرج .. 
نحل غناية .. نتذكر ... نسكر .. 
نسكت .. نغمض عينيا .. نتذكر .. شنعمل ؟ 
يتعدى قدام عينية سيناريو يتعاود ملول ..
هو : نحبك 
أنا : منحبش نحب 
هو : نحبك 
أنا : منحبش نحب 
هو : نحبك 
أنا خايفة نحب 
هو نحب نشوفك جايك من بعيد 
أنا : مريضة ، نخدم ، راسي يوجع .. منحبش نحب ..
هو : نحبك 
أنا : قلبي صغير نخاف عليه منحبش نتوجع ...
هو : نحبك 
أنا : توعدني ماتوجعنيش  ؟
هو : نوعدك ما نوجعكش نحطك في قلبي نكون أنا الدنيا .. نخبيك نحميك .. 
أنا : نحبك .. عنقني .. 
نتذكر قلبي يعصر عليا يوجعني ... كرشي توجع .. يصعب عليا انفس .. عينيا أدمع منجمش نبكي .. غصة في حلقي وقلبي وجواجيا ..
ثلاثة أشهر من بعد 
هو : ......
أنا : نحبك 
هو : ......
أنا : نحبك 

هو : ......
أنا : نحبك 

هو : ......
أنا : نحبك 

هو : ......
أنا : نحبك 

روحي  تخنقت ... نحس في روحي نظلم في روحي  .. شعري تكسر طاح ... 
شهر من بعد ...
هو : أنا نحبك أما الدنيا صعيبة معايا 
أنا : ميهمنيش  فدنيا .. تهمني إنت ...
هو : ضروفي .. 
أنا : متهمنيش ضروفك ... تهمني إنت ... نصبر .. 
هو : منجمش نكون فالمستوى ... منجمش نقوم بواجباتي حتى كى صاحب .. 
أنا : منك نخلق .. 
هو : منجمش نكون كيف الناس ..
أنا يتحرقو  الناس  ... أنا نحبك إنت .. 
هو  : عينين فيها برشة دموع وبوسة من يديا 
وخرجنا مل قهوة ... كان جيت نعرف إلي هذيك هي أخر مرة بش نسمع فيها صوتو راني عنقتو ..
جمعة ثنين تلاثة من بعد ...
هو : خرج ولم يعد ...
أنا : نخزر لتليفون 
هو : خرج ولم يعد ...
أنا : كى أي فتاة تونسية عايشة حياتها على طريقة التونسية الأمريكية الفرنسية العربية : مصدومة !!
هو : خرج ولم يعد ...
أنا : نقرا في كتاب  نسيانكم لأحلام مستغانمي 
هو : خرج ولم يعد ...
أنا : غارقة في موسيقى حزينة وكاس ... تاي 
هو : خرج ولم يعد ...
أنا : غارقة نلهي في قلبي بأفلام وكتابة و- و  و- 

هو : خرج ولم يعد ...
أنا : سلمت روحي للفراغ .. 
مانيش بش نكذب ونجيبها أنا أقوى وحدة فالتاريخ .ونقول إلي صحيح حبيتك أما انجم ننساك ... أبداً 

الأصح صحيح حبيتك وعطيتك قلبي .. ونتي بعثتني نقضي بكل أنانية الرجل التونسي ..  انجم  نخلط عليك في محاولة فاشلة بش نرجع قلبي ونرجعك .. لكن أنا قررت نخلهولك ... قلب مدمدم مجروح منقوب مايصلح لشي !! 
نخلهولك .. وسماح فيك وفيه .. سماح في ليالي سهرتها .. يا ريت كان تنجم تكمل تهز الذاكرة معاك ..   
خليني نعرف نعيش ..  خليني نعرف نتنفس .. 

ps: هذا من وحي خيال الكاتب .. 

Comments

[anonyme connu]

tres emouvant , vraiment .


peu de femmes font ca pour un homme quelque soit la relation.


ca se voit que tu es une fille bien , tu as un coeur et c'est l'essentiel, il t'as pas aimé pour ton grand coeur .


savoir aimér n'est pas donné a tout le monde ! tu sais aimé toi ! que dieu te garde !