اطلقوا سراح صابر المرايحي ! !

نكتب .. لا منكتبش .. لا لا نكتب ... لا لا ما نكتبش .. برى نكتب علاش باش نكتب .. 
عن الإحساس المرير إلي ترى فالدنيا لكلها قاعدة تنهار من حولك ونتي تتفرج وساكت هي تنهار ونتي مكتف يديك وساكت .. هي تنهار ونتي قلبك ضربو البرد و مات وساكت .. ساقيك جمدو ونتي واقف وساكت لسانك جمد في حلقك وبطبيعة ساكت .. مخك تحول لحجرة .. وقف فرد ضربة .. ونتي ساكت .. ما تقعد تخدم فيك كان العينين .. تتفرج فيها حيوط تتشقق تتكسر أرض تتزلزل ونتي واقف وساكت ..

إلا أن تعرضك حاجة ماترجعش فيك الأمل وانما من هاك القطايع إلي سكت لكل يرجع قلبك فيها تشيشة دفا .

الحاجة هاذي فال جمعة هاذي بنسبة ليا انا كانت حكاية صابر المرايحي ! بش نحكي عليها لاحقاً ..

صادف اني انا وأخت صابر نخدمو فرد بلاصة ماناش معرفة برشة من بعيد لبعيد لكن نراها ومن داخل تعجبني .. من النوع إلي تراها تبتسم وحدك .. النوع إلي صاحبي راجل أما هي مش راجل عل عكس برشة .. وال أهم هو إلي تربطت تصويرتها عندي بال أمل .. الطفلة ديمة تضحك تنقز عاملة جو في عشوية تنكرية لبسة ماسك وجناحات متع فرتطو .. كي ريت التصويرة فال خدمة منجمتش مانبتسمش ..  

الحاجات هاذومة فال عادي صعيب نفيق بهم .. مارجعو البالي كان كيف عرفت صدفة إلي هي أخت صابر المرايحي .. انك تكون بال أمل هذا لكل وتكون أخت صابر حليلي ماصعبها ..

صابر المرايحي للي مايعرفوش شاب تونسي من حومة شعبية كان صدقني ربي الكبارية ولا إبن سينا .. 25 سنا ويخدم في السكك الحديدية ..

أيامات الثورة فاع كما فاعت تونس لكل .. خرج وهاج وضرب البوليس .. ما عادي إنو يضرب بوليس ملا باش ثورة ل اطاحت نظام أزحي ..  البوليس ضرب وال  "قناصة " ضربوا وقتلوا .. وردت الفعل العادية إنو الشعب يرجع .. حتى إلتوى كل شي عادي .. المش عادي هو إنو يتحكم على صابر ب-20 سنة حبس من أجل الإعتداء على بوليس ويستينفو ويقعد باقي فال إيقاف ومعندهاش برشة بدلولو لائحة الإتهام ..

التهمة بلغة أخرى مش حرق ولا تكسير ولا سرقة التهمة هي المشاركة فال ثورة ، وتبدلت الحكومات والطفل مازال فال حبس .. وأختو باقي مأمنة نتفكر إلي هي كانت ملمراقبين فال إنتخابات يعني رغم ضلم الدولة لها وال خوها الطفلة باقي عندها نقطة أمل فال نزاهة والشفافية !

يا قلبي ! يحبوا يقتلوا فينا الامل ويردو الشعب لكل كيفي ماكينات متحركة !

 صابر المرايحي، "قانونا" قيد الإيقاف في سجن المرناڨية، مهدد ب20 سنة سجن، في بلاد الامان وال أمن وال بوليس وال بوتليس ! في بلاد ميسالش أعمل ثورة بدل صوريا المنظومات بدل حكومة جيب حكومة جديدة وبعد نحاسبوك علي عملتو فال قديمة !

اطلقوا سراح صابر المرايحي ! خذيتو الثورة سيبو الطفل عل أقل !
يصدر في ضد السلطة العدد الجاي

تونس 17 جانفي 2013