بش العدالة تاخذ .. مصروفها .

فما شعب مريض بالزهايمر حب يعمل رياضة الثورة قام يجري يجري يجري تعب وقف حط يديه على ركايبو شوية وقام قال سبحان الله وبحمده !
هذا الشعب عندو حاجة تشبه للرئيس  اسمو مومو وواحد أخر اسمو مومو حوحو نسبةً للحوتة إلي يربي فيها واحد أخر اسمو جوجو .. 
 عاد بعد أيامات من ممارسة شعب شقيق لنفس رياضة الثورة تحصر عنا واحد بغدادي تقوم تتحير شعرة حقوق الانسان عند مومو  و أرعد وأزبد مومو وحلف بالايمانات لا يرجعو للسلطات خايف عليه لا يردوه شوارما !  اش قلك حكومة عندنا مبادئ مش لعب ! وجوجو في هذا لكل يخزرلو ويضحك في هاك الابتسامة البريئة الملائكية .

أيمات من بعد جوجو قام يجري وكرفت البغدادي في طيارة ، عن حسن نية مش على حاجة ، بش العدالة تاخذ مجراها ، ويقوم مومو ويفيق بعملة جوجو ويهبل زنس هبلة ، الحاصل من كثرة الغش خرج بيان عل فيسبوك يندد بمومو وقال غلطوني مافيباليش ..
وأنا نكتب في هل حكاية يقص عليا صوت مذيع في إذاعة فرنسية يقول إلي ليبيا تتبرع التونس بدرا قداش فلوس ونفط .. 
صفقة  بيعة وشرية  .. وبرى ندد ! كان تحب إعتصم أما كيف فاتورة الضو خلص بعد اشكي .. هذا لكل بش العدالة تاخذ شنية ؟ مجراها ..
أما مجراها هذا ميتعادش بالسعودية ..
الحاصل .. نهار إليوم - الاحد -  بش يقعدلنا مرشوم .. كيفنا كيف مصر إلي نحات الفولار من وسطها وحطتو على راسها .. هنا بش نشوفو اش محضر مومو متع مصر لبقية السهرة .. 
أما ديمة السؤال وقتاش بش تستقيل مجموعات الموموات .. وإلا تسقط .. ؟