مشروع نص ..

في نهار من نهارات ، عقاب صيف أول لخريف .. طقس حزين رزين ، الدنيا مغيمة كاسدة ونسمة باردة .. خرجت فالمغرب .. تقابل في حب حياتها ولد عمها .. حلت عينيها عليه .. لتوى لا سهل ربي ولمهم سقف .. مل مشاكل بين العايلات للهروب مل جندرمية وقوات الاححح .. تلال والاسسس .. تعمار .

سوكت وحطت في فمها اللوبان .. لبست أحلى ما عندها الروبا الحمرا بالنوار عملت إتقريطة ليجابتهالها مرت المعمر من تونس ماهي تعمللها فركة صابون .. كحلت عينيها .. تلحفت وقصدت ربي .. هبطلها من الجبل ورى الطابية .. راتو وحبتو و فوق راسها حطتو .. راسو بين ضلوعها دفنتو.. من ريقو شربت .. لمت زادها وزوادها .. خزرتين تحارب بهم المستنية والوقت والبعد ..

سكرت بريحتو وروحت تتبختل .. تزرب الليل طاح .. وبوها يستبطاها .. قتلوا ماشية تقضي قضية بنات عند الخالة .. وهي مروحة عرضتها كرهبة إشوم وجوه البوم جندرمية كانو تلاثة وقفها سئلوها قلبها وقف ماعرفتش تجاوب قربولها حاوطوها مسوها شهقت حبت تتكلم سكتوها .. شافو الطريق فاضي والدنيا فارغة عروها ومن أعز ما تملك سلبوها .. الكرامة .. الكرامة .. ضربوها.. على ركايبها هبطوها .. فالاوضاع الكل حطوها .. بين إشهقة والشهقة دموعها الهابطة شربوها .. المر ذوقوها..

مل حكاية لكل متتذكر كان ريحتهم .. مهاش كي ريحة ولد العم ماشين جايين ماخذين وقتهم موش مزروبين .. وهي صاحت عيطت وبعد ولات جثة هامدة .. ضربت خبشت .. الأول ضحك والثاني يتفرج والثالث مسيب يديه تلعب .. بعد ما كملوا الروبا لحمرة لبسوها .. وقالولها تحل فمك ماتلوم كان نفسك وبوك الراجل لكبير في لحظة للحبس يطير . بكات في سكات .. القلب مات والعقل وقف على التفكير ، الجاش يحير .. زعمة تتكلم .. وولد العم وبوها اش باش فيه يصير .. كتمت السر .. وسكتت .. هاذاكة كان عام آش واربعين .. وكي يبدا الحال في ألفين وثناش.. في ألفين وثناش تقلبت لمشامية .. في إطار حرية التعبير .. مشات شكات .. وفي إطار حقوق الإنسان والمساواة بين المرأة والرجل .. هددوها أما لمرة هاذي مش اب بوها ولا خوها .. قلولها يا عورة تلم وإلا نمرمدوك فالحبس ندكوك نحطوك .. في شرفك نمسوك .. نشهرو بيك نفضحوك .. ناسية يا عاهرة إلي البوسة حرام والحب حرام .. ماعاش تخمم تي حتى إتخمام حرام .. تي الحاصل هذا كلام مش أحلام ولا أوهام .. كابوس فارضه النظام ..

هذا نصف نص بدون خاتمة .. ويبقى الباقي معلق نظراً للوضع النفسي والجوي إلخ إلخ ..

يصدر في ضد السلطة العدد الجاي كان كمل .

Sunday, September 30, 2012