حكايات نهار ثنين صباح .. حول كيف تشفى من حب تونس ..

إلي إتبع معشوقها يطول ازمان ويعوقها .. هكا تقلي ميمة ( جدتي ) .. ومعشوقي طفل صغير لابس جبة وشاشية ..
معشوقي وطن مغدور .. بلد حلت يديها لينا .. قمت الصباح ، خزرت في مرايتي .. نلقى أثار  كحل طايح ضايع  في عينيا .. زعمة بكيت ونسيت  ؟ .. المهم مسحتو وتبسمت .. خممت .. يعوقني معشوقي ولا يعوقني قلبي وضميري ..  كان عاقني معشوقي انجم نصبر روحي برشة ترهات من قبيل مكتوب .. وقدر .. ووالوقت يلعن بوه .. أما كان عاقني قلبي وضميري وين الهربة ..
قلك علاش تحب الوطن .. سؤال منتصورش روحي قادرة عل إجابة عليه ..  سؤال كيفو كيف برشة اسئلة ..

تحكيلي ميمة على البلاصة لتسكن فيها . كيفاش سموها .. قلك رجل اسمو علي .. يدو مقصوصة .. في وقت الإستعمار .. نصب مدفع عند راس الجبل بحذا مقام سيدي بالحسن الشادلي توا .. نصب مدفع وصوبو جهة باب سعدون  ويضرب به بيد وحدة .. بش يدافع على بلادو ومن وقتا تسمى البرج بسمو .. وسموه رايس . البرج هذاك كان يدافع منو على بلادو تبنت في بلاصتو قزرنة عسكرية .. إتدافع و إلا مدافعش هذيكة حكاية أخرى .. 

كيف يكون واحد عايش فالخارج مثلاً ويكبر ويحس روحو بش يموت علاش يصر بش يروح لبلادو يتدفن فيها .. ماهي كلها أرض .. وكلو تحت اتراب .. يتهيألو إن تراب بلادو أدفى وأرحم ..
كيف كنت نخدم بكري  ونتعدى الستة متع اصباح من شارع لحبيب بورقيبة .. الدنيا فارغة وكان الندوة ونسمة صباح وفيروز في وذنية ننسى إلي أنا قمت مكشبرة على خاطر بكري ونتبسم يمكن على خاطر نحس روحي ننتمي لحال بلاصة ..
الحاصل علاش تحب  تونس .. حاجة متنجمش تعرفها علاش أما تنجم تلاحظها أما إلي مازال توا هو .. اش تنجم تعمل على خاطرها .. تنجم تكمل .. متنساش إلي تونس عطتنا ثقة في بالها بش نرجعولهة شرفها المغتصب .. إنجمو نكملو ..  كل واحد على قد جهدو بالحيط للورقة للكاميرا (ورجع الكاميرا ) للوسائل الأخرى المشروعة ... خاطر مشروعيتها من مشروعية الشعب ...
اللهم كان بش نخرجو نحن ضياف  في بلدنا .. وما ضهرلي خاطرنا مازلنا هنا .. ولن يمروا ..

رحمة الخبثاني . 

ضد السلطة العدد 26