نعبر وإلا نعبر ..

التعبير..
أنعبر ولا نعبر ..
نعبر بحرية ولا نعبر بمسؤلية ولا نعبر تو كور ..
أصلاً كان بش نعبر بحرية .. بش تتسمى بالحق حرية ؟؟ .. أصلاً شنية مفهوم الحرية .. وبطبيعة بش يحطولنا حدود للحرية من قبيل تنتهي حريتك عندما تبدأ حرية غيرك .. او في لحظة تلقى روحك مربوط بغيرك ..
ويطلعولك بحكايات التعبير المسؤول ..  مسؤول على شنية سامحني ..
يحب يقول كل واحد يتحمل مسؤليتو وكان حكيت هكا ولا هكا تتشد ! و أهوكا تتسمى غلطك ! ما إحترمتش التعبير المسؤول ..
التعبير .. في تونس .. قلنا إلي بن علي .. كان قامع التعبير قبل 2011 .. باهي وبعد 2011 .. زعمة بن علي زادة ..
احنا إلي قامعين رواحنا .. المقص الذاتي .. نبداو بحكاية نسمة .. تصوير الذات الإلهية .. !! رغم اني مانيش من أحباء نسمة لكن شكون فينا متصورش ربي كيف كان صغير .. متخيلوش .. ما حكاش معاه.. عل أقل إلي نعرفو أنا حكيت معاه ..
نشالله مايقوموش بتكفيري لكن أنا كيف كنت صغيرة كنت نسخايل روحي أنا وربي خوات .. خاطر نحس إلي هو ديمة معايا وديمة حاميني .. خاطر ديمة نعمل عمايل للمعلمة .. ونسلكها ومنتعاقبش ..  خاطر نضيع ستيلواتي ونمنع من طريحة ماما  .. في مخي انا وقتها أي واحد ياقف معك هو خوك  .. إذاً انا وربي خوات وأنت نبدا نقول فيها ونعاود .. والعباد يقولوا استغفر الله .. وانا نحب نفهم علاش استغفر الله .. شقلت انا ..  نحب نفسر يقولولي أسكت .. ونلقى روحي كل عادة منعبرش .. وتموت الفكرة فيا .. وتتكون لعقد ..
من بعد حكاية التصويرة .. ومكثرهم التصاور .. وقداش عيات الجرايد تعديلنا في تصاور هيفاء ونانسي وياما كانوا لابسين أقل من مرت الجوار .. علماً وإنو مرت الجوار مغطيها راجلها ..
لكن كيفاش الجريدة تونسية مايجيش وه .. نحنا ناس لا ننشر الصور العارية  على الصفحة الاولى أما ميسالش فالصفحة 6 ولا 12 .. ونتفرجو فيهم بالسرقة وجهار عل مجللات الأجنبية وينجم يبداو المجللات الأجنبية بحذا التونسية فرد كشك فرد صف .. لكن مش مشكل المهم التعبير التونسي لا ..
كما منجموش نقولوا كلام زايد إن بوبليك .. قدام الناس بالعالي وبتونسي أما كيف نقولوها بالفرنسيس  تتعدى ..ويظهر سبان متع ناس متثقفة ..
اى فالأخير .. نخلط للمقال لخر متاعي في ضد السلطة .. وبالأحرى للتصويرة المرافقة.. النصف إمرأة العارية .. على حسب ماسمعت وما  جاني في  البوات د رسبتيون .. إنو قلك اشمعنى بن بريك ميتشدش ومتع التونسية يتشدني .. يابني فهمني علاش أصلاً تدعو بش يتشدو .. يا عزيزي هو كان حطينا حرية المرأة في جسدها .. بلاش تصوير كلمة جسدها مش باش تحيلك على شي في مخك .. ؟؟ خيالك لها الدرجة مربوط مش بش يهزك لبعيد ولا حتى لقريب ..
التعبير في بلادي يقعد حكاية منامة .. حلمة صعيب تتحقق .. كيفها كيف الحرية .. وديمقراطية واجو هذاك لكل ..
سيبني نعبر وماتخافش ما نضلمكش .. أما كان تغلط منرحمكش ..
سيبني نحكي قلبي معبي .. وقيت نحط العقد متاعي على جنب ..
مش غلطتي إلي نعبر وتعبيري معجبكش .. غلتطك إلي فهمتني بالغالط
مش غلطتي اني منعرفش نتكلم أما غلطك خاطر مخلتنيش نتعلم نعبر.
سيبني نتنفس .. راني بش نعبر بسيف عليك .. وراني ديمة نعبر أما إنت إلي مش ديمة تفهمني .. راني كان صورت نعبر .. وكان غنيت نعبرء و- كان شطحت نعبر وكان سكتت نعبر وكان صحة نعبر وراني بش نبقى ديمة نعبر خليني نعبر بكيفك وكيفي ونعرف إلي كيفي وكيفك مايتقابلوش ..
ماتخافش مني وانا نعبر راني أخطر كان منعبرش ..
مالقيتش خاتمة نوفى بها نصي.. و  هذا عل أغلب نتيجة لوحدة مل عقد إلي عندي مل صغرة  من أسكت يزي عيب متحكيش هكا مش حلو ماتقولش هاك لكلمة مش مليح ..
نفضل نسكت على روحي ويوفى النص هوني ...


حقها .. تحية لروح الروح متع إتعبير اليحياوي ...

وكل عادة لن يمروا ..

رحمة خبثاني
ضد السلطة العدد 14