خارطة الأحزاب

23.10.2011

par

le 05/09/2011 à 23h21 (336 Lectures)

ليوم 05 سبتمبر 2011
3 أيام منذ إنطلاق تقديم إترشحات والقوائم
إحصائيات : 110 حزب ، 260 قائمة .. يا حبيبي على زمن كيما يقول سي مختار ..
سؤالي : كيفاش بش يتقبل اشعب التونسي الصدمة .. صدمة انتقاله من إنتخابات ال-99% إلى إنتخابات ال-260 قايمة والعدد مرشح للزيادة ؟؟؟ على أي أساس سيختار الشعب ؟؟ على أساس الكسكروتات ؟؟ إعانة العيد والعودة المدرسية ؟؟ على أساس إن واحد يعرف شكون يعرف شكون أخر يعرف شكون ثالث في حزب ؟؟ يا رسول الله ويني لاحزاب ؟؟ وينهم المرشحين المستقلين؟؟

بخلاف التكتل والديمقراطي التقدمي والنهضة الغنية عن التعريف وسي المرزوقي وحزب العمال والوطن إلي
شفنا اشهارات متاعو أكثر مل مقرونة رمضان السنى .. والقطب الديمقراطي ؟ البقية وينهم ؟؟ العبرة بالمشاركة ولا هانا ننفخو في أرقام الإحصائيات زعمة زعمة عنا ديمقراطية
؟؟؟

أنا ملول عملت خريطة كيف كانوا اش وستين اليميني واليساري ودرى شنوا ومن بعد قلت نستناهم كيف يكملو وبعد تو نتصرف ..وبعد مقيدتش وبعد وبعد ...
بقية اشعب إلي ثقافتو السياسية تاعبة كيفي ؟؟ اش يعمل؟
باهي إلي ميقراش واللي الدنيا عاملة فيه واللي حاير واللي مش فاهم ؟؟

باهي يعيشكم من فضلكم يا احزابنا الاعزاء تفاهموا في بعضكم في كوجينتكم الداخلية مش نهار نهارين هاو مكتب ولاية إستقال هاو عضو سب هاو منعرش شكون قال منعرش شنية
يا ولادي يهديكم تفاهموا في بعضكم راهي مصداقية حزبكم فاللعبة وكيف تتمس المصداقية حيرة المواطن تزيد ويولي معاش مثبت روحو ويتبنى هل مجلس إتأسيسي على أسس
خايخة ...

وبعد ترتيحة صغيرة تأملية بين لفايسبوك وموقع سي المرزوقي و سلاطين الطرب
نرجع وأنا في حاجة ماسة ال"كعبتين " إفرلغان وقهوة بش نستطيع فهم حكاية الإستفتاء وموقف كل حزب (مل 110 الموجودين ) منو ...
وقيل لنا عودة قريبة ..