تسعة أشهر بعد الثورة ..

BlueBerry  le 22/09/2011 à 18h06 (270 Lectures

)

   

   الثورة علاش صارت؟؟

 

نتذكر إلي نهارات إلي توحد الشعب التونسي وخرج فرد نهار كنت 
مطالبو بسيطة في الظاهر لكن بالوقت عرفت إلي هي ياسر صعبة في مضمونها وفي تحقيقها ...
نتذكر إلي مطالب الشعب كانت العدالة الاجتماعية وحرية الرأي ...
العدالة الاجتماعية نعرف إلي صعبة تحقيقها في شوية وقت .. والمساواة بين الجهات شي مينجمش يتحقق فيسع ومهوش كن فيكون ... ودولة ورئيسها شهر لوست 
مهمش سحرة حتى ليمسوا الدولة بالعصى ... تتصلح .. (رغم إلي سمعت إلي لمسان بالعصا إختصاص الدولة التونسية ) .
على كلٍ نتعدو لنقطة الثانية ..
حرية الرأي ..هذي نتصورها حاجة معقولة برشة بمجرد إسقاط النظام أو بالأحرى رأس النظام إلي لم يسقط وانما هرب ... اتبعي تكون عنا شوية حرية رأي ... 
الشيء إلي مريتوش برشة ...
مانيش بش نحكي على المواقع إلي تفتحت .. ولا على الملتحين إلي ولاو يعيشوا في حياتهم العادية ... خاطر هاذم في رايي حاجة بديهية برشة ..
نحكي على سمير الفرياني .. إلي كيف حل فمو سكرهولو .. بأكثر من 100 يوم حبس ومحاكمة مؤجلة إلى ما لا نهاية وتهم كي تسمعها تموت بالرعب ...
نحكي على أكثر من مظاهرة حضرت فيها شخصياً وتقمعت رغم الطابع السلمي لهذه المظاهرات ..
نحكي على ثورة بدات تبرد في قلوب العامة ..
نحن وين من هذا لكل ؟؟ 
عند إحساس كبير إلي الثورة اجهضت ...
عند إحساس إلي الدولة وإلا أطراف أخرى شعارها الدوام ينقب الرخام ..
يعرفوا إلي اشعب التونسي مسكين يحب يعيش رايض يربي أولادوا ويرجعهم للمكتب ويعدي العيد إلخ ... إلي لعام ماعندهمش صبر للثورة المستديمة ..
سؤالي من بنية تونسية تقرا وتخدم وفهمها السياسي على قدو .. 
أنا وين ؟؟ احنا وين ؟؟ هل من مجيب ؟ 

Tags: free samir feriani