حكايات من هوني وغادي ..

par 

BlueBerry

le 07/10/2011 à 14h46 (372 Lectures)

نهار جديد بعد 3 أيام بدون انترنت .. جيت نلوج على شفما وشصاير في أحول لبلاد ..
أول خبر يعرضني ...

سيف جلاصي مات وهو يشري في قازوزة .. الأسباب ملاحقة خفيفة من رجال الأمن إلي والحق يقال ديمة في خدمة اشعب .. علاش كيفاش .. المهم النسخة إلي وصلتلي مل حكاية فعلاً تجيب حالة مل غثيان ..
ثاني خبر .. ماهر المحظي مسرحي وشاعر يتحكم ب-3 أشهر لأن قال عل
facebook

إلي هو رأى مدير دار ثقافة أو شيء من هذا لقبيل في إجتماع خارج أوقات لعمل مع تجمعي سابق في القيروان
هل هذا سبب لوضع أستاذ في لحبس وبهذلته أمام لمحاكم .. كي هي هكا لحكاية لم لا ندورو ع صفحات لعار بودورو ونبداو انظفوها .. صفحات الاشهار اسياسي الممنوع .. صفحات لبهامة .. صفحات الكذب ونفاق الاجتماعي و سياسي .. كي هي الدولة تدخل فيل فاسبوك وتويتر تدخللن بربي في هذم رهو شي فات طاقة الإحتمال عندي .. الاهم .. هو السؤال التالي إذا كان فما إطار عامل فسلك الحكومي يستغل في دور الثقافة وشباب والأماكن إلي مجعولة للعمل في اجتماعات شخصية خارج أوقات لعمل وحسبها دار السيد الوالد ومع شكون مع تجوعي بطابع بنفسجي ألون ... نسكتوا منتكلموش ؟؟؟ نعملوا عين رات وعين مراتش باش منشدوش الحبس الله الله ...
بعمري مكنت لا نفهم فسياسة ولاني ثورجية لكن كي نرى العوج انجم نميزو ..
تحية صغيرة للعبقرينو إلي خمم فل الأماكن متع تعليق القوائم الانتخابية ..
نحن فلحومة جاو علقوا بحذا المعهد الكولاج متع إزغزغ بختصار كل قائمة تتعلق تتقطع في نهارها .. ومن غير منحكيو على التوعية والوعي مع صغار 12 13 و-14 سنة
تحية أخرى لكل ممثلي الاحزاب إلي نراهم في إطار حملتهم وكل واحد نقلوا مانيش بش ننتخب تعدى للي بعد يقلي اقرا برنامجنا تو تبدل رايك .. نقرا لبرنامج نقعد نخمم وين قريتو قبل وبعد نطيشو فلساك مسكين الساك ...
تحية عطرة لشوفور التاكسي إلي قلي تحبشي تخدم فلحزب متاعنا !! رهو متع شباب وجو وشيخات ...
بديت نخلوض يعني وقيت قهوتي
لنا عودة


في عودة صغيرة بعد مقال لبارح .. حبيت نقول إلي ليوم زادة قبلت جماعة حزب النهضة .. وبعد محكينا شوية قتلي قيدت قلتلها لا .. بابتسامة خفيفة يخي جاوبتني قتلي احنا توا تحت الأمر الواقع .. انا ننصحك تنتخب ..
إنتخب الحزب إلي فيه مصلحة لبلاد ويعرف ربي !!!

ويعرف ربي !! هكا !! معناها بش نقيم النهضة بصفة عقلانية من دون المشاعر الدينية لازمني نكون يا لا متدينة يا شخصيتي قوية برشة !!
شوية أخر يقولك إنتخب حزب حلال !!
كفانا يا هذا !!!



لنا عودة

Mis à jour le 08/10/2011 à 17h56 parBlueBerry